Мүнөөдэр, декабриин 9-дэ Буряад Уласай Арадай Хуралай Түрүүлэгшэ Владимир Павлов Эсэгэ ороной баатарнуудай үдэртэ зорюулагдаһан баяр ёһололой суглаанда хабаадаба. Митинг Улаан-Үдэ хотын Илалтын Дурасхаалай хүшөөгэй дэргэдэ үнгэрөө.
Эрэлхэг зориг, эхэ орондоо дурлал, бата бэхи байдал, үнэн сэхэ ябадал хадаа хэр угһаа хойшо Ородой сэрэгэй һүлдэ тэмдэг байгаа бшуу, харин сэрэгэй шэн зориг хэзээдэшье хүн түрэлтэнэй гол шанарнуудай нэгэн гэжэ анхан сагһаа мүнөөшье болотороо тоологдодог юм, гэжэ Уласай парламентын хүтэлбэрилэгшэ Владимир Павлов тэмдэглэбэ.
- Энэ үдэр Эхэ орондоо агууехэ дурлалай болон жэнхэни патриотизмын һүлдэ тэмдэг боложо үгөө. Эхэ оронойнгоо түлөө дайлалдажа байһан манай нютагай сэрэгшэд булта Геройнууд гээшэ, - гэжэ Владимир Павлов тодоруулба.
Владимир Павловай хэлэһээр, сэрэгэй тусгаар үйлэнүүдтэ хабаадагшад удаадахи үетэндэ омогорхол ба жэшээ боложо үгэнэ. Уласай һунгамалнуудай зүгһөө сэрэгэй үйлэнүүдэй ветерануудта, сэрэгэй тусгаар үйлэнүүдтэ хабаадагшадта сэрэгэй уялгадаа үнэн сэхэ, Эхэ орондоо үнэншэ байһанайнь түлөө баярые хүргэбэ.
- Манай гүрэнэй эрхэтэдэй солото болон баатарлиг туйлалтанууд хэзээдээшье эб нэгэдэлэй, бэе бэеэ дэмжэлгын болон патриотизмын жэшээ хододоо болохо бшуу. Хүндэтэ манай ветеранууд болон геройнууд! Эхэ орондоо үнэн сэхэ, эрэлхэг, баатаршалга болон зоригойтнай түлөө баярые хүргэнэбди. Өөһэдынгөө хэрэгүүдээр, ажаһуудалай жэшээгээр түрэл газартаа дурлан,ямаршье бэрхэшээлнүүдые дабажа, зорилгодоо дабшажа, Илалтые туйлалта бидэндэ дамжуулаат.Энхэ элүүрые, амгалан байдал, мүн эгээл шухала- Эб найрамдал хүсэнэб! Эсэгэ Ороной баатарнуудта Алдар Соло!- гэжэ Владимир Павлов онсолбо.
Митингын һүүлээр Владимир Павлов Буряад Уласай Толгойлогшо Алексей Цыденовтай суг хамта Илалтын дурасхаалай Хүшөөдэ баглаа сэсэгүүдые табиба.
