Улаан-Үдын Сампиловай нэрэмжэтэ уран һайханай үзэсхэлэн дэлгэдэг газарта Даша Намдаковай «Гэр тээшээ харгы» гэһэн үзэсхэлэн 6 наһанһаа дээшэ харагшадта дэлгэгдэбэ. Нээлгэдэ Буряад Уласай Арадай Хуралай һунгамалнууд хабаадаа.
Энэ үзэсхэлэн уран барималшын олон жэлнүүдэй туршада уран һайхан аргануудые бэдэрэлгэдэ зорюулагдаһа байна. Тиихэдээ үнгэрһэн сагуудай бүтээлнүүд болон домог түүрээлгэнүүд дээрэ үндэһэлэн 2000 онһоо хойшо бүтээгдэһэн томо хүдэлмэринүүдтээ бусажа дэлгээ: «Ерээдүй тухай дурсалга», «Баян бэри», тиихэдэ һүүлэй үеын «Элшэ», «Эхин» болон бусад. Эдэ бүтээлнүүдэй олонхинь элдэб олон гүрэнүүдэй уран бүтээлнүүдые суглуулагшадай хубиин жасада хадагалагдажа байдаг.
– Энээхэн үүдэнэй саана юун байгаа юм, мэдэнэгүйб, үзэсхэлэн дэлгэхэдээ намай оруулаагүй, минии хабаадалгагүй дэлгэһэн байна. Тиимэһээ бишье таанар мэтэ эндэ боложо байһан ушарай гэршэ болохомни гээшэ. Минии эгэшэнэрэй мүнөөдэр намтай эндэ байлсаһанда тон ехэ баяртайб, бидэ сугтаа Намдаковтанай бүлын хүүхэлдэйнүүдые сугтаа бүтээһэн байгаабди. Энэшье ушар намда шухала. Энэ үзэсхэлэн юундэ иимэ нэрэтэйб гэхэдэ, мүнөө үедэ Тужада, Байгал дээрэ боложо байһан үйлэ хэрэгүүд минии уг нютагаа бусалга болоно бэшэ аал даа. Нэгэ, томохон, жэжэ урлалнуудай орондо, удхатай юумэ бүтээхэ дуран хүрэнэ. Зондо һонин байхаар, соёлой болон буряад заншалнуудай хэмжүүр ямар бэг гэжэ хүнүүдэй ойлгохоор. Энэ ушараар бидэ суг уралагшадтайгаа ехэ юумэ хэнэбди, – гэжэ Даша Намдаков хэлэбэ.
Үзэсхэлэн нээлгэдэ Буряадай засаг зургаануудай хүтэлбэрилэгшэд, тэрэ тоодо хотын Захиргаанай толгойлогшо, Арадай Хуралай һунгамалнууд хабаадалсаа. Буряад Уласай Арадай Хуралай Түрүүлэгшын орлогшо Баяр Гармаев:
– Би Даша Бальжановичые үнинэй мэдэхэб, үндэр бодолтой, үндэр аргатай хүн. Иимэ хүнүүд мянган жэлдэ нэгэн түрэдэг байһан байха. Тэрэнэй бүтээлнүүд Оросой хотонуудаар, бүхы дэлхэй дээгүүр байха. Хүнүүд харахаяа ерэжэл байдагууд, тиихэдээ хүн бүхэниинь, юуб даа, тон өөрын юумэ, анхардаг ёһотой. Бүтээлнүүдыень оршон үеын урлал шэнжэлэгшэд тон үндэрөөр сэгнэдэг.
Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшэ Виталий Лыгденов:
– Энэмнай тон шухаг үзэсхэлэн – маанарта бултандамнай бэлэг. Хүн бүхэндэ гэр тээшээ замынь нангин гээшэ. Дашын бүтээл бүхэн тон өөрсэ бэлэг. Би нютагтаа, Захааминдаа ямар нэгэн бүтээл байгуулхаар уриһан байнаб. Тиихэдэм: «Тиишээ ошохо хэрэгтэй, нютагай агаараар амилха, мэдэрхэ. Тиихэдэл, юум даа, нэгэ юумэ бүтэжэ болохо», – гэжэ хэлээ. Урлалай оршон соогуур ябадаг хүнүүдтэ байгаалитаяа, газар нютагуудтай харилсаха хэрэгтэй. Тиигэжэл гайхалтай бүтээлнүүд мүндэлнэ ха юм, – гэжэ хэлэбэ.
Эндэ бүхыдөө 90 хүдэлмэринүүд дэлгэгдэнхэй, тэрэ тоодо саарһан дээрэ зурагууд, гэрэл зурагууд. Эдэ бүгэдэ Намдаковай урлалай жасаһаа. Эндэ суглуулагдаһан хэдэ үе сагуудта байгуулагдаһан бүтээлнүүдые харахада, агууехэ уран бүтээлшын арга шадабаринууд яажа хубилнаб гэжэ анхархаар. Гэрэл зурагууд дээрэ Даша Намдаковай олон ондоо хотонуудаар ябажа буулгаһан хүшөө боломоор хүдэлмэринүүдые хаража боломоор.
Үзэсхэлэн 2024 оной февраль болотор үргэлжэлхэ.
6 наһанһаа доошо хүүгэдтэ орохо хорюултай гэжэ үшөө дахин һануулнабди.
