Мүнөөдэр Буряад Уласай Арадай Хуралай можо хоорондын харилсаануудай, үндэһэ яһатанай асуудалнуудай, залуушуулай бодолгын, ниитын болон шажан мүргэлэй нэгэдэлнүүдэй талаар хорооной газарһаа гадуур зүблөөн үнгэргэгдэбэ.
Хорооной түрүүлэгшэ Виталий Лыгденов, тэрэнэй орлогшо Баир Цыренов, орлогшо Максим Бувалин гэгшэд Уласай Арадай Хуралай Зүблэлэй зүблөөндэ бэлэдхэлэй хэмжээндэ уласай Үндэһэтэнэй музейн – аймагай соёлой гол объектнүүдэй нэгэн болохо – шэнэ байшанай барилга шалгаба.
«Ростех» гэһэн гүрэнэй корпорациин гэшүүн «Инфратех концессии» гэһэн АО-гой региональна түсэлэй захирал Вячеслав Макаров баригдажа байһан байшан харуулаа. Тиихэдээ 4 миллиард түхэригэй барилгын түсэлдэ мүнгэн һан ВЭБ.РФ-эй ашаар үгтэхэ гэжэ тэрэ мэдүүлээ. «КонсСтрой» гэһэн ООО юрэнхы подрядчиг болоно.
Арадай Хуралай хорооной гэшүүдтэ түсэл бэелүүлэгдэхэ талаар дэлгэрэнгы мэдээсэл үгтэбэ. Мүнөө дээрээ 60% дүүргэгдэнхэй. Музей энэ намар нээгдэхэ түсэбтэй. Барилгашад газар хүдэлэлгын аюулгүй байдал болон газар доорохи уһа хамгаалалгада онсо анхаралаа хандуулаа, энэнь мүн лэ зохеомол газарай участок барилгатай холбоотой. Энэнь ерээдүйн үзэсхэлэнгэй аюулгүй байдалда шухала. Үерэй аюул байхагүй гэжэ мэргэжэлтэд найдуулна. Гэбэшье, түхеэрэлгэнь хубилгагдаһан, хадагалха газарые байшангай дээдэ дабхарта үргэһэн байна.
Ерээдүйн музей табан дабхартай, үзэсхэлэнгэй 15 танхимтай байха. Нээгдэхэдэнь, айлшад 7000 хүрэтэр үзэсхэлэн хараха аргатай, харин мүнөөдэр оройдоол 2000-3000 үзэсхэлэн хараха аргатай. Музейн суглуулбариин нэгэ хубинь хадагалагдажа, һэргээлтэ хэрэгтэй. Шэнэ байшан соо музейн зүйлнүүдые һэргээхэ тусхай таһалганууд байха.
