Буряад Уласай Арадай Хуралай Түрүүлэгшэ Владимир Павлов уласай толгойлогшо Алексей Цыденовтэй суг Мухар – Шэбэр – Бэшүүр – Хяагта замаар заһабарилагдаһан харгыгаар ябадал нээбэ.
Энэ замай 10 модо (24-дэхи модоһоо 34-дэхи хүрэтэр) «Аюулгүй шанартай харгынууд» гэһэн үндэһэн түсэлөөр бэелүүлэгдээ. Нёдондо жэл эхилээд, энэ жэлдэ дүүргэгдэһэн энэ бүхы хүдэлмэридэ 390 гаран миллион түхэриг гаргашалагдаһан байна. Харгын заһабарилгада орожо болодог бүхы ажалнууд бэелүүлэгдээ – харгын аюултай нугалаанууд сэхэлэгдээ, эридэ доошолһон, дээшэлһэн газарнууд нам болгогдоо, харгын дэбисхэр хушалгада гушан мянга шахуу дүрбэлжэн метр зам хушажа болохо холисонууд дэбдигдээ, замай нюрууда һэргылэлгын зург-тэмдэгүүд, автобусай буудалнууд болон бусад зохидоор тодхоогдонхой. Энэ хүдэлмэри дүүргэхын тула 50 гаран оньһон техникэ, 100 гаран хүнүүд хабаадуулагдаа.
Мухар-Шэбэр – Бэшүүр – Хяагта шэглэлээр зурыһан зам хадаа манай уласай можо нютагай удха шанартай гол замуудай нэгэн юм, гурбан аймагуудай захиргаануудай түбүүдые уласай ниислэл Улаан-Үдэ хототой холбодог.
Арадай Хуралай Түрүүлэгшэ Владимир Павловай хэлэһээр, Заганай дабаан заһабарида орохын урда аюултай харгынуудай тоодо ородог байһан юм:
- Би, Арадай Хуралай һунгамал хадаа, Бэшүүрэй аймагай һунгагшадай зүгһөө энэ зам заһабарилхын тухайтай хандалгануудые саг үргэлжэ абадаг байгааб. Энэ хадаа гаргаша ехэтэй, ехэ хүдэлмэри байгаа, ойрын саг соо дүүргэжэрхихэ хэрэг бэшэ байгаа. Бага багаар, алхам бүхэнөөр энэ ехэ барилга тээшэ оролдолгоёо шэглүүлһээр, энэ асуудал шиидхэгдэбэ гээшэ. Заһабарилагдаһан харгын нээлгэ харгын ажахын хүдэлмэрилэгшэдэй мэргэжэлтэ үдэртэй тудаа, энэнь айхабтар ехэ удха шанартай гэжэ тооломоор байна. «Камстром плюс» гэжэ Хизаарлагдамал харюусалгатай эмхидэ шанартай харгы бүтээһэн ушараарнь баяр хүргэнэб! Ээлжээндэ үшөө нэгэ хүшэр газарта заһабарилга хэхэ хэрэгтэй. Һунгагшадай захилнууд дүүргэгдэжэл байха, - гэжэ Владимир Павлов хэлэбэ.
Уласай Толгойлогшо Алексей Цыденов харгын энэ хэһэгэй нээгдэһэн ушараар амаршалаад:
- Бидэ нэн түрүүлэн оронойнгоо Юрэнхылэгшэдэ баяр хүргэхэ ёһотойбди, юундэб гэхэдэ Буряад орондо харгынууд «Аюулгүй шанартай харгынууд» гэһэн үндэһэн түсэлөөр заһабарилагдана, эндэ харгын федеральна жасын туһа айхабтар ехэ, маанарта тэндэһээ мүнгэн һомологдоно. Энэ харгын түлөө эгээл ехээр һанаагаа зобоһон хүн Владимир Анатольевич Павлов байгаа. Улас доторнай заһабарилагдаха харгынууд бии, тэдэмнай бага багаар хэгдэжэл байна, - гэжэ хэлэбэ.
Бэшүүртэ ажаһуудаг Екатерина Бухольцева хэлэхэдээ, энэ Заган дабаанай заһабарилагдахаһаа урид зоболон һэн даа гэбэ. Тиихэдээ:
- Бүтүү, манаржа байһан шорой соогуур ябагдагша бэлэй. Арадай Хуралай һунгамал Владимир Павловта хэдэ дахин хандаһан байнабди. Тиигэжэ һунгамалаймнай оролдолгоор 2018 ондо харгымнай заһабарилагдажа эхилээ, тад ондоо болоо, Европын гүрэнүүдээр ябажа байна гээшэ гүбди гэжэ һанахаар, - гэжэ баяраа мэдүүлбэ.
