Вячеслав Дондоков сентябрь һарада долоодохи зарлалай Арайдай Хуралда һунгагдаһан юм. Мүнөө Арадай Хуралай Ниигэмэй бодолгын талаар хорооной түрүүлэгшын орлогшын тушаалдаа орожо, ажллажа эхилээ. Мүнөө болоходо Эсэгэ ороноо түрүү зэргэдэ хамгаалжа ябагшадтаа һунгамал тушаалдаа орожо туһалхаар бэлэн.
Сэрэгэй бүридэлэй офицер, эмнэлгын албанай капитан, эмнэлгын батальоной нүүдэл бүлэгэй командир тэндэ сэрэгшэдэй ами наһа абаржа алба хээ.
– Вячеслав Борисович, танай һайн дураараа сэрэгэй тусхай ябуулгын газар ошоходотнай юун түлхисэ болоо гээшэб?
– Би алба хэдэг һэм, сэрэгэй бүридэлэй офицерби. Тэндэ адба хэжэ байгшадай дунда олон нүхэдни ябана. Нёдондо жэл сэрэгтэ таталгын эхилхэдэ, нютагаймнай олон зон сошордожо, хилын саагуур тэрьедэжэ ошоно бэлэй. Сэрэгтэ татагдаха ямаршье шалтагаан, баримта үгы хүнүүд мүн лэ зугадажа ошоо. Эхэ орондоо урбажа болохогүй гэжэ этигэдэгби.
– Мэнэ һая та «ӨӨҺЭДЫНХИДТӨӨ» гэһэн үндэһэн шагналда зууршалагдаат. Таниие иигэжэ сэгнэһэндэюун гэхэ байнат?
– Би юрэл өөрынгөө хэдэг лэ ажалаа хэжэ ябааб.Тэндэ, сэрэгэй эмнэлгын газарта хүдэлжэ байһан хүбүүдэй түлөө омогорхол түрэнэ. Энэ шагнал хадаа манай сэрэгшэдэй ами наһа абаржа ябагшадай хамтын ажалай дүн гэжэ тоолохо байнаб. Ехэ олон, тон лэ илгарһан, шагнагдаха ёһотой хүбүүд энэ шагналда хүртөө – һайн дуратан, манай ажалые араһаамнай дэмжэгшэд.
– Та мүнөө Арадай Хуралай Ниигэмэй бодолгын талаар хорооной түрүүлэгшын орлогшын тушаалдаа оробот. Һунгамал болоо хадаа юу хэжэ, яажа хүдэлхэ тухай бодолго байгаа бэзэ даа?
– Би эмнэлгын албанда олон жэлнүүдэй туршада ажалланаб. Хориин аймагай түбэй эмнэлгын албаниие ударидажа хүдэлөөб, 2022 ондо уласай түргэн туһаламжын Ангаповай нэрэмжэтэ эмнэлгын газарай ахамад эмшэнээр томилогдоо бэлэйб. Эмнэлгын хүдөөгэй албанда байхадаа бүхы албан зургаанууд болон яамануудтай харилсажа ажаллаха саг болодог һэн. Ниигэмэй бодолго гээшэ юун гээшэб гэжэ тон һайн ойлгожо байнаб. Эмнэлгын албанай байгуулга бүхыдөө, тэрэнэй шиидхэгдээгүй, хүшэр хүндэ асуудалнууд ямар бэ гэжэ һайн ойлгожо байнаб. Ниигэмэй бодолгын бусад шэглэлнүүд руу бага багаар орожо байнаб. Хорооной бүридэлдэ гол шэглэлни эмнэлгын албан намдал даалгагдаха байха гэжэ һананаб, юундэб гэхэдэ намда, эмшэн мэргэжэлтэй хадамни, ойлгоходом хүнгэн байха.
– Сэрэгэй хүбүүдтэ Буряад ороной үзүүлжэ байдаг туһын зэргэ түһа үзүүлжэ байдаг можо нютагууд тиимэшье олон бэшэ. Танай һанахада, үшөө юун дуталданаб?
– Эхин дээрээ ондоо байгаа. Жэлэй туршада хангамжын талаар байдал һайн тээшээ хубилаа. Боложо байһан үйлэ хэрэгтэ хүбүүдэймнай хандаса ондоо болоо, дайсантай тэмсэжэ һураа, оршон байдалдаа дадаа. Үнгэрһэн жэлэй һүүлээр тэндэ хүрээ ошоһоноо һананаб, бүхы юумэн ойлгосогүй, аймшагтай байгаа. Мүнөө энэ эрид хубилаа. Мүнөө тэндэ тад ондоо сэрэгэй хүсэн. Буряад ороной ажаһуугшадай, Засагай Газарай дэмжэлгэ һайн. Туһа үзүүлэлгэеэ үргэлжэлүүлхэ хэрэгтэй: дронуудые, автоунаануудые, зайн гал үйлэдбэрилдэг түхеэрэлгэнүүдые, квадрокоптеруудые. Эдэ бүгэдые худалдан абажа, тиишэнь эльгээжэ байха хэрэгтэй. Мүнөө үеын байдалаа сэрэгэй ябуулга ондоо болонхой.
