Буряад Уласай Арадай Хуралай Түрүүлэгшэ Владимир Павлов Казахстанай үндэһэтэдэй эрдэмүүдэй академиин бодото гэшүүн Асан Оспановтай уулзаба.
Ажалай уулзалгада мүн лэ Арадай Хуралай Түрүүлэгшын орлогшо Баир Гармаев болон ВСГУТУ-гэй эдэй засагай эрдэмэй доктор Баянжаргал Шаралдаев гээд хабаадалсаа.
Казахстанай эрдэмтэн, профессор, академик, мүн Буйлуулгын болон эдеэнэй үйлэдбэриин эрдэмэй- шэнжэлэлгын дээдэ һургуулиин Хүтэлбэриин түрүүлэгшэ Асан Оспанов Улаан-Үдэ руу гурбадахияа ерэһэнээ мэдүүлбэ.
Энэ удаа Буряадай хүдөө ажахытай болон эдеэнэй үйлэдбэритэй танилсаха болон Буряадай ВСГТУ ба БГСХА гээд ехэ һургуулинуудта эрдэмэй хани барилсаа бэхижүүлхэ зорилготой ерэһэн байна.
Ажалай түсэбөөр Буряадай гүрэнэй хүдөө ажахын академиин мэргэжэлтэд Казах эрдэмтэниие Сэлэнгын аймагай Ацула һууринда оршодог шасаргана ургуулдаг газарта абаашажа харуулха юм.
Буряад Уласай Арадай Хуралай Түрүүлэгшэ Владимир Павловай мэдээсэһээр, Оросой Холбоото Улас Казахстан хоёр олон һалбаринуудаар харилсаа ябуулдаг. Буряад Улас эдеэ хоолой болон болбосоруулгын шэглэлдэ дүй дүршэлөөрөө хубаалдаха баяртай байха бшуу.
«Эдэй засагай харилсаанууднай нилээд һайн хэмжээндэ байна. Казахстанай болбосоруулгын һалбарида манай дүй дүршэл амжалтатай хэрэглэжэ болохот. Эдеэ хоолой зүйл – үндэһэн арадай элүүр энхэ байдал болоно. Ажаһуугшад һайн шанартай, аша туһатай зүйлнүүдые абаха ёһотой», - гэжэ Владимир Павлов тэмдэглэбэ.
Буряадта шасаргана үйлэдбэриин хэмжээндэ үни сагһаа ургуулагдадаг.
«Буряад орондо жэлдээ 300 нарата үдэр байдаг хадань, эндэ хүдөө ажахын элдэб янзын ургамалнуудые, тэрэ тоодо болбосоруулгада хэрэглэхэ жэмэстэ ургамалнуудые ургуулха ехэ арга боломжонуудые үгэнэ.Эрдэмэй шэнжэлэлгын ажалнууд дээдэ һургуулинуудта ябуулагдана. Энээниие Буряадай хүдөө ажахын академи болон бусад Буряадай дээдэ һургуулинууд бэелүүлнэ. Буряадай дээдэ һургуулинууд жэмэстэ ургамалнуудые болбосоруулха, удаань үйлэдбэриин ажахыда хэрэглэхэ оньһожуулгануудые ашагладаг юм. Гадна манай эгсэ уларилтай газарта үнэтэ эм домто ургамалнууд ургадаг, тэдэниие эмэй зүйлнүүдые үйлэдбэрилгэдэ хэрэглэдэгбди», - гэжэ Владимир Павлов нэмэбэ.
Ажалай уулзалгын үедэ хабаадагшад Буряадай болон Казахстанай хоорондохи харилсаха элдэб һалбаринууд, манай можодо болон Казахстанда хүдөө ажахын хүгжэлтын онсо шэнжэнүүд, мүнөө үеын хүдөө ажахын оньһожуулганууд, эрдэмэй талаар андалдаха арга боломжонууд, ажалшадай асуудалнууд, һүнэй үүлтэрэй мал ажахы хүгжөөхэ тухай гээд хэдэн асуудалнуудые зүбшэлсэбэ.
Зүблөөнэй эсэстэ Буряадай Арадай Хуралай Түрүүлэгшэ Владимир Павлов Асан Бекешовичтэ баярые хүргөөд, эдэй засагай талаар саашанхи хамтын ажал бэхижүүлгэдэ этигэжэ байһанаа мэдүүлээ.
