Уласай хуули гаргадаг, түлөөлгэтэ дээдын суглаанай түрүүлэгшын тушаалда хоёр кандидатура дэбжүүлэгдэһэн байгаа. Энэ ехэ хүлгөөтэ, хүлеэгдэһэн халуун асуудал энэ үдэрнүүдтэ элирбэ. Арадай Хуралай долоодохи зарлалай тушаалда Владимир Павлов дахинаа һунгагдаба. Владимир Павловые түрүүлэгшээр һунгахын түлөө «Нэгэдэмэл Росси» гэһэн фракци дэбжүүлээ. Һунгагдаһан түлөөлэгшэдэй зүблөөндэ 55 дуугаар Владимир Павлов Коммунис партиһаа дэмжэгдэһэн Виктор Малышенкые диилэбэ. Коммунист Малышенко 8 дуу абаа.
- Хүндэтэ Арадай Хуралай һунгашамнууд! Намда этигэһэнээтнэй түлөө ехэ баяр хүргэнэб. Саашаа хамта, урдаа табигдаһан ехэ хэрэг, ажал урагшатай бүтөөхэбди гэжэ үнэншэнэб! - гэжэ нюуса дуугаар томилогдоһон түрүүлэгшэ Владимир Павлов үгэ хэлэбэ.
Түрүүлэгшын орлогшонуудай тушаалда томилогдохын түлөө Татьяна Мантатова ба Баир Гармаев хоёр нюуса һунгалтаяа мүнөө хүлеэжэ байна.
- Зонһоо олон захяа, ехэ асуудалнууд бидэнэртэ ороһон, табигдаһан байна. Ехэ ажал урдамнай табигдаатай. Жэшээнь, харуул үгы гэрэй амитадай асуудал, олон зоной байдаг гэрнүүдэй газаахи арюун сэбэрэй асуудал, хуулиин наһа хүсөөгүй үхибүүдтэ архи худалдахые хорихо арга. Энэ хэлэһэн асуудалнуудые Уласай ба федеральна хэмжүүридэ гаргагдажа шадагдаһан байна. Тиихэдээ бидэн юумэ хэхэ шадалтай байнабди. Хуулиин гаргалгые ондоо, зондо хэрэгтэй, таарама болгохо аргатайбди, - гэжэ Татьяна Мантатова үгэ абаа.
Һануулхада болоно: уртайнь Владимир Павлов зургаадахи Хуралай зарлалда түрүүлэгшээр томилолдоһон байна. Тиихэдэ Татьяна Мантатова ба Цырен-Даши Доржиев вице-спикерэй тушаалда байгаа.
Урда тээнь зүблөөн дээрэ комиссиин гэшүүд томилогдоһон байна.
