Мүнөөдэр Буряадай ниислэлдэ буряад хэлэ бэшэгэй багшанарай можо хоорондын 3-дахи съезд нээгдэбэ. Доржи Банзаровай нэрэмжэтэ БГУ-да Буряадай, Эрхүү можын, Забайкалиин хизаарай 300 гаран багшанар, эрдэмтэд, методистнууд, ниитын ажал ябуулагшад суглараа.
Буряад Уласай Арадай Хуралай Түрүүлэгшэ Владимир Павлов сугларһан зониие буряадаар мэндэшэлжэ, гүрэнэй хэлэндэ хүндэтэйгөөр хандаха, тэрэнээ хэрэглэхэ жэшээ харуулба.
- Буряад Уласай Арадай Хурал Буряад Уласай Толгойлогшотой болон Буряад Уласай Засагай газартай хамта буряад хэлэ, уран зохёол сахин хүгжөөхэ, Буряад Уласай «Буряад хэлэ гүрэнэй хэлэн гэжэ дэмжэлгын хэмжээнүүд тухай», «Буряад Уласай хэлэн дээрэ» гэһэн хуулинуудые һайжаруулха талаар үргэн дэлисэтэй ажал ябуулна Буряад Уласай арадууд», мүн «Буряад Уласта болбосорол тухай». «2030 он болотор буряад хэлэ хүгжөөлгын стратеги» наймадахи жэлээ бэелүүлэгдэжэ, «Буряад Уласта буряад хэлэ сахин хүгжөөлгэ» гэһэн мүнөө үеын гүрэнэй программада үндэһэ боложо байна. Гүрэнэй программада мүнгэн һомололго жэл бүри нэмэгдэжэ, буряад хэлэнэй хүгжэлтэдэ нүлөөлһэн хэдэн шухала асуудалнуудые шиидхэхэ арга олгоно. Тэрэ тоодо кадрнуудые бэлдэлгэ, эдэбхитэй хэлэнэй оршон үргэдхэлгэ, һуралсалай арга боломжонуудые һайжаруулга, буряад хэлэн дээрэ мэдээсэлэй болон цифровой нөөсэ байгуулга болоно. Гүрэнэй программа бэелүүлгэдэ 2025 ондо республикын бюджедэй гаргашанууд 100 608 100 түхэриг боложо, 2026 ондо 103 680 900 түхэриг хараалагданхай гэжэ парламентын түрүүлэгшэ тэмдэглэбэ.
Буряад хэлэнэй ерээдүй, тэрэнээ заалгада мүнөө сагай арга боломжонууд, залуу мэргэжэлтэдые бэлдэлгэ, үндэһэн соёл сахиха асуудалнуудта гол анхарал табигдана. Хабаадагшад болбосоролой шэнэ түсэлнүүдые, һуралсалай-методическа программануудые, болбосоролой системэдэ түрэлхи хэлэнүүдые дэмжэлгын асуудалнуудые зүбшэн хэлсэнэ. Съездэй хэмжээндэ буряад хэлэ хүгжөөхэ, олондо дэлгэрүүлхэ хэрэгтэ хубитаяа оруулһан багшанарые, мэргэжэлтэдые хүндэлхэ ёһолол үнгэргэгдэбэ.
