Августын 16-да Улаан-Үдэ хотодо соёлой шэглэлэй үшөө нэгэ һонирхолтой хэмжээ эмхидхэгдээ.
Буряадай ниислэл хотын түүхэтэ – Гостиные ряды гэһэн дурасхаалай газарта болон тойроһон оршон дэбисхэр дээрэ ёһотойл арт-юртэмсэ байгуулагдаа. Ажаһуугшад болон айлшад эндэ хүгжэмшэдэй, зохёохы бүлгэмүүдэй дэлгэһэн наадаар сэдьхэлэй хужарлажа, уран гартанай бүтээлнүүдээр нюдэеэ шэмэглэжэ, уран оёдолшодой хубсаһанай суглуулбаринуудтай танилсажа, аяншалгын һалбариин мэдээжэ спикернуудэй хөөрөө шагнаха аргатай байгаа.
Буряад Уласай хуули баталалгын зургаанай зүгһөө Арадай Хуралай Түрүүлэгшын уялга саг зуура бэелүүлжэ байһан Баир Гармаев фестивальда хабаадагшадые угтан амаршалба.
- Уласай болон Улаан-Үдэ хотын арад зоной соёлой ажаһуудалда шухала удхатай хэмжээн болоно гээшэ. Фестиваль – юрын наадан бэшэ, харин соёлой, аяншалгын шэглэлнүүдтэ түлэбүүдые шэнэ үндэр хэмжээндэ үргэхэ, бага болон дунда зэргын олзын хэрэг эрхилэлгэдэ туһа болохо үүргэтэй. Энэ хэмжээн «Гостинодворские ряды» гэһэн гүрэнэй удхатай соёлой һүлдэ баялигай дэргэдэ үнгэргэгдэһэн ушар онсо тэмдэглэлтэй. Энэ дурасхаалай газар хадаа Буряад Уласай Засагай Газарай болон Арадай Хуралай аша оролдолгоор һөөргөө уласай эдлэл зөөри руу дамжуулагдажа, һэльбэн заһабарилгын ажалнуудай түсэблэлдэ оронхой. Энэ ехэ удха тэмдэгтэй газар бшуу: юуб гэхэдэ, эндэ алта мүнгэнэй хэншүү үнэр мэдэрэгдэдэг. Олзын хэрэг эрхилэгшэд ерэжэ, урдын сагай байдалайнь һүлдэ түхэл һэргээхэл байха, гэжэ найданаб. Тиигэжэ хотымнай түб газар шэмэглэгдэн, өөдөө бодхоогдожо, түхэл шарайнь һайжархал ёһотой, - гэжэ Баир Гармаев тэмдэглээд, фестивальда хабаадагшадта уран зохёохы хэрэгтэнь болон саашанхи хүгжэлтэдэнь шэнэ түлхисэ абахыень хүсэбэ.
