баннер новая бурятия

МЧС-эй түлөөлэгшэд түймэр сарадаг шэнэ оршон үеын оньһото хэрэгсэлнүүдые абаба

Общество |
Фото: Татьяна Никитина

Мүнөөдэр Улаан-Үдэ хотын түб талмай дээрэ МЧС-эй түлөөлэгшэд түймэр сарадаг шэб шэнэхэн оршон үеын оньһото хэрэгсэлнүүдые баяр ёһололой байдалда тушаан абаба, тэдэнэй хэлэһээр, иимэ хэрэгсэлнүүд тухай һанамжалхашье аргагүй байгаа бшуу.

Иимэ бэлэг абаһаарынь эрэлхэг зонуудые амаршалхаяа Буряад Уласай Толгойлогшо Алексей Цыденов, Арадай Хуралай Түрүүлэгшэ Владимир Павлов, Оросой Онсо ушаралта байдалай яаманай Буряад Уластахи гол хүтэлбэриин даргын уялга дүүргэгшэ, дотоодын албангай полковник Евгений Шангин болон бусад зон ерэһэн байна.

Бүгэдэнэй һонорто табигдаһан хэрэгсэлнүүдэй арга боломжонуудые тэмдэглэхэдээ, 8 тонно уһа багтааха аргатай КамАЗ-ай шасси дээрэхи туймэр саралганай автоцистернэ эгээл хүшэр түймэрнүүдые унтарааха аргатай гэжэ онсолбод.

- Танай эрэлхэг болон нигүүлэсхы ажалда, хүн зониие абардаг хүнгэн бэшэ албандатнай амжалтануудые хүсэнэбди. Зарим ушарта дайшалхы үйлэнүүдтэй жэшээмээр байдалда таанар ажалаа эрхилдэг гээшэт, энэ оршон үеын оньһото түхеэрэлгэнүүд танай хэрэгтэ туһа болог лэ даа. Энхэ элүүрые таанарта хүсэнэбди, бэеэ гамнагты, - гэжэ түймэр сарагшадые Буряад Уласай Арадай Хуралай Түрүүлэгшэ амаршалба.

Соносхогдоһон мэдээсэлээр, Буряад Уласай аймагуудта һүүлэй табан жэлэй туршада  21 мянга гаран түймэрнүүд элирүүлэгдээ, 4 мянган хүнүүд абарагдажа, аюулта газарһаа гаргагдаһан юм. Һүүлэй 7 һарын туршада 2 605 түймэрнүүд усадхагдажа,  505 хүн абарагдаа. 2017 онһоо 2023 он болотор уласай бюджедэй 120 сая мүнгэнһөө дээшэ зөөреэр түймэр сарадаг 17 оньһото хэрэгсэлнүүд худалдан абтагдажа, һалбаринуудай үлэмжэ бэлэн байлга  болон түймэр, тэрэ тоодо нюуруу түхэлэй газарай түймэрнүүдые, саралгын ашаг үрэ дээшэлүүлээ. 2024 ондо уласай бюджедһээ 61 сая түхэриг гол шэглэлэй түймэрэй 5 автоцистернэнүүдые худалдажа абалганда һомологдоһон байна.

Тэги: МЧС
Кол-во просмотров: 2172

Поделиться новостью:


Поделиться: