Үнгэргэгдэһэн сесси дээрэ уласай һунгамалнууд «Захиргаанай хуули һандаргалтанууд тухай» гэһэн хуули руу хубилалтануудые оруулба. Юрэ хэлэбэл, шэнэ эрилтэнүүдые тогтообо, тэдэниие һандаргабал, хуули хазагайруулһан болохо. Хэрбэеэ анхан улаан дэбтэртэ ургамалнуудые болон амитадые суглуулга, хадагалга, шэрэлгэ, наймаалга али эльгээлгын ушар ганса можын удхатай онсо хамгаалгын байгаалиин дэбисхэрнүүд дээрэ шалгагшад элирүүлбэл, тэрэнэй түлөө яла ашагдадаг байгаа, харин мүнөө иимэ ушарнууд байгаалиин онсо хамгаалгын дэбисхэрнүүдэй хилэнүүдэй саанашье ушарбал, ехэхэн яла ашагдаха бшуу. Иимэ ушарнуудые Буряадай байгаалиин хиналта тодоруулдаг.
Байгаалиин нөөсэнүүдэй болон экологиин сайд Наталья Тумуреевагай тайлбарилһаар, тус хуулиин түлэб тохёолдоһон ушарнуудта хуулиин эли бэшэ байдал усадхаха зорилготойгоор бэлдэгдэнэ. Хэһээлтэ тухай хэлэбэл, энэ һандаргалтын түлөө эрхэтэдтэ 1500 -һаа 2500 түхэригэй яла ашагдаха, тушаалта нюурнуудта - 15 000 - һаа 20 000 түхэригэй, хуулита нюурнуудта - 300 000 – һаа 500 000 мянган түхэригэй яла түлэгдэхэ аргатай.
Хуулиин түлэбөөр суг элидхэл хэгшэ, Арадай Хуралай һунгамал Анатолий Кушнарев Улаан дэбтэртэ оруулагдаһан сагаан дали Улаан-Үдэ хотын түб дэлгүүр дээрэ болон бусад газараар үнинэй сүлөө наймаанда табяатай байдаг гэжэ бүгэдэнэй анхарал табин мэдээсэбэ. Гэхэ зуура, шэнэ хуулиин ёһоор өөрын гэрэй газаа хамһабариин газар дээрээ улаан дэбтэртэ ургамалнуудые олзын хэрэгэй түлөө бэшэ, бэеэ элүүржүүлхын зорилготой ургуулдаг зон хайшан гэхэ болоноб, энээн тухай тайлбари үгы бшуу.
Бүгэдэнэй мэдэһээр, можын удхатай Улаан дэбтэр руу ургамалнуудай оруулагдаһан ушар энэ заалһаа үгы боложо байһан хоморой бэшэ, харин элбэгээр ургадаг ургамал байжа магад, гэжэ мэдээсэл ниитэ ажал ябуулагшад эрдэмтэдэй анхаралда оло дахин табидаг юм. Дэлгүүр дээрэ сагаан дали худалдадаг олзын хэрэг эрхилэгшэд энэ үйлэ баримталдаг, тиигэжэ ургамал элбэгээр ургадаг газарһаа суглуулагданхай гэжэ этигүүлээд, харин ехэнхи ушарта өөһэдөө суглуулаагүй, юрэ худалдажа абаабди гэжэ гэршэлдэг.
