Өөрын нютаг нугада үйлэ хэрэг зохёожо, бүхыдэлхэйн хэмжээндэ харагдаа үзэгдөөгүй юумэ яагаад дурадхахаб? Энэ болон бусад асуудалнууд “Үндэһэн арадуудай тамирай зүйлнүүдые хүгжөөлгын бэрхэшээлнүүд болон тэдэниие шиидхэхэ харгы зам” гэһэн эрдэмэй-практическэ коференцидэ хэлсэгдэбэ. Тус хэмжээ ябуулга “Алтан Мундарга” гэһэн уласхоорондын хуралдаанай үедэ болоһон байна. Хүндэтэ айлшадай тоодо Буряад Уласай Арадай Хуралай түрүүлэгшын орлогшо Баир Гармаев оролсоо.
Дэлхэй дээрэ 10 мянга гаран үндэһэн арадуудай нааданууд тоологдоно. Харин Буряад Уласта оройдоол зургаан зүйл үндэһэн арадуудай наадануудай бүридэлдэ ороно. Буряад бүхэ барилдаан, һур харбалга, мори урилдаан, буряад шатар наадан, һээр хухалга болон шагай наадан гэгшэд болоно.
Буряад Уласай тамирай сайд Иван Козырев, Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, ниитын ба шажануудай нэгэдэлнүүдэй талаар хорооной түрүүлэгшэ Виталий Лыгденов гэгшэдэй хабаадалгатайгаар үндэһэн арадуудай наадануудай бэрхэшээлтэ асуудалнуудые тамирай зүйлнүүдээр федерацинуудай гэшүүд, тамирай ветеранууд, хуули зохёогшод, ниитын ажаябуулагшад хэлсэһэн байна.
Этническэ наадануудай бүхыдэлхэйн конфедерациин юрэнхылэгшэ Асхат Акибаев зорюута Буряад Уласта ажалай хэрэгээр ерээ. Асхат Акибаев хадаа нүүдэлшэ арадуудай бүхыдэлхэйн наадануудай түсэл зохёогоод бэелүүлнэ. Кыргызстанһаа ерэһэн хүндэтэ айлшанай тэмдэглэһээр, нүүдэлшэ арадуудай бүхыдэлхэйн нааданууд аяншалга хүгжөөлгэдэ тон ехэ нүлөө үзүүлнэ. 47 тамирай зүйлнүүдһээ бүридэһэн үндэһэн арадуудай наадануудай һайндэр харахаяа хүнүүд олоор ерэнэ. Ганса Кыргызстанда 6 сая 200 мянга гаран аяншалагшад хари гүрэнүүдһээ ерэһэн байна. Энэ түсэлэй ашаар Кыргызстан мэдээжэ аяншалгын гүрэнүүдэй тоодо орожо шадаа, нааданай болоһоной удаа холбоото бюджедтэ оруулагдаһан мүнгэнэй тоо эрид дээшэлнэ.
Бидэ буряад-монголой заншалнуудые һэргээхэ ёһотойбди. Юуб гэхэдэ, буряад угсаатанай наадануудай ашаар залуу халаан олоор тамираар бэеэ һорижо эхилнэ. Эндээ амжалтануудые туйлажа тэдэ һүжэрнэ, Буряад Уласай урдаа хараха эрхэтэдэй тоодо орожо, түрэл нютаг нугаяа холо ойгуур суурхуулна ха юм. Олон үндэһэн яһатанда өөрын барилдаан, һур харбалга, мори урилдаан бии гээшэ. Харин бидэ һээр шаалганай мүрысөө хүгжөөхэ аргатайбди. Бултаараа энэ ажал урагшатайгаар ябуулая. Энэ талаар Буряадай Арадай Хуралай һунгамалнууд бүхыгөөрөө оролдоно, - гэжэ Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, ниитын ба шажануудай нэгэдэлнүүдэй талаар хорооной түрүүлэгшэ Виталий Лыгденов сугларагшадта дуулгаа.
