Мүнөөдэр Буряад Уласай Арадай Хуралай Зүблэлэй суглаан Буряад Уласай Арадай Хуралай Түрүүлэгшэ Владимир Павловай хүтэлбэри доро үнгэрбэ. Һунгамалнуудай урда Буряад Уласай Хүн зониие ниигэмэй талаар хамгаалгын сайд Татьяна Быкова элидхэл хээ. Тэрэ үндэр наһатай эрхэтэдэй болон эрэмдэг бэетэй хүнүүдэй хубида «Буряад Уласай дэбисхэр дээрэ эрхэтэдые ниигэмэй талаар хангалга тухай «Буряад Уласай Хуули бэелүүлгын ябаса тухай» хөөрэжэ үгэбэ.
Тиихэдээ Хуули бэелүүлгын хэмжээндэ 20 гаран улас түрын болон албан захиргаанай хуули ёһын гуримшуулагдаһан шиидхэбэри абтаа гэжэ тэмдэглэбэ.
- Буряад Уласай Хүн зониие ниигэмэй талаар хамгаалгын яаманай шухала шэглэл хадаа эрхэтэдтэ ниигэмэй талаар туһа хангамжа үзүүлхэдээ шэнэ, аша үрэтэй онол аргануудые байгуулга болоно. Мүнөөдэрэй байдалаар манай Яаман ниигэмэй талаар хангалгын бэеэ дааһан 15 эмхи зургаануудые байгуулаад байна, - гэжэ Татьяна Быкова тэмдэглэбэ.
Гадна ниигэмэй талаар хангамжа үзүүлдэг эмхинүүдэй бүридхэлэй данса дотор ниигэмэй хангамжа үзүүлдэг гүрэнэй бэшэ 22 эмхинүүд тоологдоно.
- Саг үргэлжын нүүдэл бэшэ түхэл ниигэмэй талаар хангалгын гол шухалануудай нэгэн гээшэ. Мүнөөдэрэй байдалаар иимэ нүүдэл бэшэ түхэлөөр наһатай болон эрэмдэг бэетэй хүнүүдтэ 23 эмхинүүд хангалга үзүүлжэ байна, - гэжэ сайд нэмэжэ хэлэбэ.
Дээдэ-Онгостойн ниигэмэй талаар элүүржүүлгын таһагта 14 хоногой туршада саг зуурын байлга наһажаал хүнүүдэй дунда ехэ эрилтэтэй. Эндэ һайн шанартай санаториин хэмжээндэ амаралтаһаа гадуур ниигэмэй болон эмнэлгын талаар туһа хангамжануудые абажа болохо. Эмнэлгын элдэб аргануудай хажуугаар Зүүн зүгэй, Сибиириин ургамалнуудые хэрэглэһэн эмнэлгэ хэрэглэгдэнэ. Һанаа сэдьхэлэй талаар мэргэжэлтэдтэй хубиин болон бүлэгөөрөө хэшээлнүүд, бэеын соёл элүүржүүлгэ-һайжаруулгын хэшээлнүүд болон «Элүүр энхын һургуулида» хөөрэлдөөнүүд үнгэргэгдэнэ.
«Аха үетэн» гэһэн түсэлэй хэмжээндэ Алас-Дурнын тойрогто тон шухаг болон шэнэ түхэлэй эгээ ехэ пансионадай 1 миллиард 300 миллион түхэригэй барилгын түгэсэжэ, Улаан-Үдэдэ нээгдэһэн ушар үнгэрһэн жэлэй айхабтар ехэ удха шанартай үйлэ хэрэг болоһон байна.
Арадай Хуралай Зүблэлэй суглаанда бэлэдхэлэй хэмжээндэ Арадай Хуралай Ниигэмэй бодолгын талаар хорооной «Түхэреэн шэрээгэй» нүүдэл зүблөөн «Этигэл» гэһэн ниигэмэй талаар хангалгын нэгэдхэгдэмэл түб» гэһэн бэеэ дааһан эмхидэ үнгэргэгдөө. Тэндэ мүнөөдэрэй байдалаар 307 хүн ажаһууна.
Ниигэмэй бодолгын талаар хорооной түрүүлэгшэ Игорь Марковецэй хэлэһээр, ниигэмэй талаар хангалгые һайжаруулгада, ниигэмэй талаар хүдэлмэриин бүхы хубилалтануудай арад зоной оршон үеын эрилтэнүүдтэ харюусаһан, шэнэ түхэлнүүдые нэбтэрүүлгэдэ шэглүүлэгдэжэ байһан, ажаһуугшадай һалбариин хүтэлбэридэ хабаадажа байһан ушар хэлсээнгүй. Нэгэ талаһаа, манай орон дотор орхигдоһон наһатай хүн, эрэмдэг хүн нэгэншье байха ёһогүй. Нүгөө талаһаа зарим эрхэтэдэй ажалгүй тэжээбэриин бодол болюулха хэрэгтэй – бэеэ хүсэһэн үхибүүдэй эхэ эсэгынгээ харууһые гүрэнэй хүзүүн дээрэ ашаха ябадалда хатуугаар хандаха.
Мэдээсэл шагнаһанай удаа Арадай Хуралай Зүблэл тогтоолой түлэб дурадхалнуудтай баталжа абаа. Буряад Уласай залуушуулай эмхинүүдые, залуушуулые Эхэ орондоо дуратайгаар хүмүүжүүлгын эрилтэнүүдэй талаар аха наһатантай хүдэлхэ хэрэгтэ хабаадуулха хэмжээнүүдые абаха гэжэ Буряад Уласай Засагай газарта дурадхаа. Хүдөө нютагуудай засагай зургаануудта ганса нэгээрээ ажаһуудаг наһатай хүнүүдые ниигэмэй талаар харгалзаха, хойноһоонь ниитын болон залуушуулай эмхинүүдые, һайн дуратаниие хабаадуулан, ажалаа гуримшуулха дурадхал оруулагдаа.
