Буряадай Арадай Хуралай һунгамалнууд өөһэдынгөө урда шухала даабари табиба. Агууехэ Илалтын 80 жэлэй ойн баярта, мүн лэ Эсэгэ ороноо хамгаалагшын жэлтэй дашарамдуулан улас дотороо байһан кадетскэ ангинуудай дүй дүршэл шэнжэлжэ эхилбэ.
Энэ зорилгоор Арадай Хуралай Ниигэмэй бодолгын талаар хорооной түрүүлэгшэ Игорь Марковецэй ударидалга доро бүлэг һунгамалнууд энэ ажал хэрэг эгээл эршэтэйгээр ябуулжа байһан Улаан-Үдын һургуулинуудта ажалай зүблөө үнгэргөө. Энэ хэмжээ ябуулгада мүн лэ Буряадай Болбосоролой болон эрдэм ухаанай яаманай түлөөлэгшэд, Улаан-Үдэ хотын Захиргаанай Болбосоролой хороон, олондо мэдээсэл тараадаг хэрэгсэлнүүд болон Улаан-Үдэ хотын хасаг армиин “Верхнеудинская станицын” атаман, Хойто Милитын хабаадагшадые дэмжэлгын талаар гүрэнэй хүтэлбэрилэгшын орлогшо “Эсэгэ ороноо хамгаалагшад” Буряадта Денис Леонов гэгшэд хабаадаһан байна.
Мэргэжэлтэдэй тайлбарилһаар, мүнөөдэр Улаан-Үдын 9 һургуулида кадетскэ классууд байгуулагданхай. Улаан-Үдэдэ эгээл түрүүн энэ ажал эхилжэ, нилээн амжалта туйлаһан 52-дохи, 18-дахи һургуулинуудаар тэдэ ябахаяа шэлээ.
Арадай Хуралай Ниигэмэй бодолгын талаар хорооной түрүүлэгшэ Игорь Марковецын мэдүүлһээр, кадетскэ һуралсал тухай хуули шэнээр бэлдэгдэжэ байнхай. Энэ һалбариие һуралсалай гуламтануудта гуримшуулха, аша үрэтэй ажал ябуулха талаар бата бэхи һуури шэнэ хуули байгуулха ёһотой.
- Бидэнэй хараһан юумэн һайн һанаа түрүүлээ. Һургуулиин багшанар үнэхөөрөө бүхы һүнэһэ һүлдэеэ, шадабарияа ажалдаа, һурагшадтаа оруулдаг байна. Мүнөөдэр бидэ ганса эрхим дүнгүүдые хараа бэшэбди, мүн тон дүтын ерээдүйдэ шиидхэгдэхэ бэрхэшээлтэ асуудалнуудтай танилсаабди. Мүнөөдэр бүхы һургуулинуудта кадетскэ классуудтай нэгэ талмай үгы, дүй дүршэлөөрөө андалдалга, һуралсалай стандартнууд, нэгэ янзын түхеэрэлгэнүүд болон методическа дэмжэлгэ үгы. Харин һургуули бүхэндэ кадетскэ классуудые бии болгожо, патриотическа ажал ябуулха тухай хэлсэжэ байгаа һаа, иимэ хуули хэрэгтэй. Сэдьхэлээрээ, бэе махабадаар шанга, зүб бэлэдхэлтэй, һэжэггүйгөөр, хэрэгтэй һаа, Эхэ ороноо хамгаалха һурагшад хэрэгтэй гэжэ мүнөөнэй байдал тодорхойлно, - гэжэ Игорь Марковец бата найдана.
