Буряад Уласай Арадай Хуралай түрүүлэгшэ Владимир Павлов AIST Global гэһэн телесубагай сэхэ дамжуулгада хабаадаба.
Дамжуулга Буряад Улас, Үбэр Байгалай хизаар болон Эрхүү можо гээд гурбан нютаг можонуудаар нэгэ доро ябуулагдаа, гэжэ Арадай Хуралай мэдээсэлэй албан дуулгаба.
Бүгэдэ Буряадай Ехэ наадан мүнөөдэрэй байдалаар буряад арадай оюун ухаанай нэгэдэлэй һүлдэ, үндэһэн һайндэр, уласхоорондын хэмжээнэй соёлой болон тамирай ехэ һайндэр гээшэ, - гэжэ Арадай Хуралай түрүүлэгшэ тэмдэглээ.
- Уласхоорондын хүндэлэлдэ хүртэһэн «Алтаргана» наадан буряад арадай заншалта соёлой болон тамирай үндэһэн шэглэлнүүдые һэргээлгэдэ, хамгаалгада болон хүгжэлтэдэ, соёл урлигай, уран зохёолой, тамирай талаар эрхим туйлалтануудые харуулалгада болон үндэһэтэдэй эбтэй харилсаанай болон бэе бэедээ тэсэмгэй байдалай үүсхэлнүүдые дэлгэрүүлгэдэ, манай арадай олон сая жэлнүүдэй ёһо заншал үндэһэлэн, ургажа ябаа үхибүүдые хүмүүжэлэлдэ ехэхэн нүлөө үгэдэг юм, - гэжэ Владимир Павлов онсолбо.
Бүгэдэ Буряадай «Алтаргана» наадан Монгол ороной Булганай аймагта июлиин 26-28-ай үдэрнүүдтэ үнгэрөө, гээд һануулая. Һайндэрэй түсэбөөр үзэмжэнүүд, харалганууд, дүхэриг шэрээнүүд болон бусад зугаа сэнгэлгын олон тоото хэмжээнүүд эмхидхэгдээ гээшэ.
