Июлиин 9-дэ Улаан-Үдын түбэй стадион дээрэ Буряад Уласай ехэ гол hайндэрэй –«Наадан-Сурхарбаан- 2023» баяр ёhололой амаршалга үнгэрбэ. Буряад оронойнгоо ажаhуугшадые, айлшадые, сурхарбаайнай гэшүүдые амаршалхаяа Буряад Уласай Арадай Хуралай Түрүүлэгшэ Владимир Павлов, Буряад Уласай засагай Түрүүлэгшын орлогшо Иван Альхеев, Буряад Уласай тамирай ба залуушуулай бодолгын сайд Иван Козырев ба бэшэ ноёд амаршалгада ерэбэ.
- Сурхарбаан – бухы буряад арадай ёhо заншал, ёhо гурим, соёл нэгэдхэhэн мянган жэлэй түүхэтэй манай hайхан hайндэр. Иимэ hайндэр хүмүүжэжэ байhан залуу үетэндэ, хүүгэдтэ ехэ зохидоор харагдана гэхэ байнаб. Мори урилдаа, барилдаа, hур харбаа хаража байхадаа, зүрхэндөө бултынь шэнгээжэ, уг гарбалайнгаа ёhо заншалтай, түрэhэн нютагтаяа, арад зонтоео бүгэдэ нэгэдэнэбди. Манай аба эжын hургаал, хани барилсаан, ёhо заншал саашаа бүрижэ, бүхэдэжэ байна гэжэ хэлэхэдэ болохо. Манай Буряад Уласай hайндэрөөр бүгэдэ бултыетнай амаршалнаб! - гэжэ ород, буряад хэлэн дээрэ Владимир Павлов зоноо амаршалба.
Энэ үдэр баяр ёhололой гүрэнэй шагналай амаршалга үнгэрбэ. Тэрээн дээрэ «Буряад оронойнгоо ашада хэhэн габьяа» медаль Буряадай региональна илгалтын «Дайшалхы хани нүхэрлэлэй» захиргаанай гэшүүн Баяр Цырендашиевта барюулагдаба. Энэ хүн 40 жэл соо, мүнөөдэшье Эхэ Ороной Эсэгын дайнда ами наhаяа үгэhэн Буряад оронойнгоо сэрэгшэдые Курскын, Ростовой, Ленинградай газараар бэдэрhээр.
«Дайшалхы хани нүхэрлэлэй» захиргаанай гэшүүд, арадай «Бүгэдэ фронтодо!» гэжэ ябуулгаанай эмхидхэгшэд Николай Воротников, Иван Михайлов «Уялгын ба зүрхэнэй дуудалгаар» гэhэн дурасхаалта медальнуудта хүртэбэ.
- Хүндэтэ Буряад Уласай ажаhуугшад, айлшад! Мунөө бултадаа хамтаржа Эхэ ороноо хамгаалха саг ерээ! Энэ манай сэхэ уялга. Эхэ эсэгын заабаряар булта бодожо, фронт, тыл нэгэдэе. Олон яhатанай эбтэй байдаг манай Россиин арад зон хэзээдэшье дилдээгүй, диилдэхэшьегүй! - гэжэ халуун үгэ СВО-до хабаадаhан сэрэгшэ Николай Воротников хэлэбэ.
