Мүнөөдэр “Нарата” гэһэн аха захатанай гэр байрын дэргэдэ засагай бүхы һалбаринуудай түлөөлэгшэд, ниитын ажаябуулагшад, сэрэгэй тусхай үйлэ хэрэгтэ хабаадагшад суглараа. Буряад Уласай Толгойлогшын захиргаанай хүтэлбэрилэгшын уялгануудые дүүргэгшэ Михаил Харитонов, Буряадай хүнэй эрхэнүүдые хамгаалгын талаар эрхэтэ түлөөлэгшэ Юлия Жамбалова, Буряадай Арадай Хуралай Ниигэмэй бодолгын хорооной һунгамалнууд эндэ хабаадаа.
“Равный равному” гэһэн түсэл хоёрдохи жэлээ Ородой Юрэнхылэгшын грантнуудай жасын дэмжэлгэдэ хүртөө. “Общество без барьеров” гэһэн коляскаар ябадаг эрэмдэг бэетэйшүүлэй ниигэмэй жаса тус түсэл зохёожо, бэелүүлнэ. Сэрэгэй тусхай үйлэ хэрэгтэ болон бусад дайшалхы хоморёлдоонуудта хабаадажа, эрэмдэг бэетэй болоһон ветерануудта туһа үзүүлхэ түсэл гээшэ. Амгалан тайбан ажабайдалда ветерануудые дадахын түлөө ажал хэрэг ябуулагдана. Энээниие бэелүүлхын түлөө засагай бүхы һалбаринууд, тамирай, эмнэлгын, соёлой гуламтанууд нягта харилсаа холбоотойгоор хүдэлхэ ёһотой. Тэдэнэй дунда тусхай хэлсээн баталагдаһан байна.
- Тус түсэлэй удхань ехэ. Өөһэдөө арад зон арга боломжонуудые дурадхана ха юм. Коляскада һууһан эрэмдэг бэетэй хүнүүдэй ажабайдалда дайралдадаг бүхы бэрхэшээлнүүдые дабажа гараһан жэшээ дээрэ хүндэтэ ветеранууднай ажабайдалда бусан дадаха арга олгогдоно. Тиимэһээ Ородой Юрэнхылэгшын грантуудай жасын, Буряад Уласай засаг газарай дэмжэлгэдэ хүртэһэниинь гайхалгүй. Сэрэгэй үйлэ хэрэгтэ хабаадаһан ветеранууд нёдон жэлдэ һуралсал гаража, һоригшод, багшанар боложо шадаа һэн. Эдэнэр өөһэдынгөө дүршэлые шэнэ ветерануудта мүнөө жэл дамжуулха зорилготой. Тиигэжэ тэдэ шэнэ шэнэ хүнүүдые һургахаар хараалагданхай, - гэжэ Буряад Уласай Арадай Хуралай Ниигэмэй бодолгын хорооной түрүүлэгшэ Игорь Марковец хөөрэнэ.
