“Единая Россия” гэһэн намые олониитын дэмжэлгын штабай дэргэдэ хоёр үзэсхэлэн нээгдэбэ. Агууехэ Илалтын ойн баярта зорюулагдаһан үзэсхэлэнүүд онсо ехэ удхатай. Буряад ороной мэргэн буудагшад тухай “Не знающие промаха” гэһэн үзэсхэлэниие Улаан-Үдэ хотын түүхын музей эмхидхэлгэдэ туһалаа. “Китель Победы” гэһэн үзэсхэлэндэ мүнөө сагта амиды мэндэ ажаһуудаг Эсэгэ ороноо хамгаалгын дайнда хабаадаһан баатарнуудтай танилсахаар.
“Китель Победы” гэжэ үзэсхэлэн эмхидхэжэ байһан Улаан-Үдэ хотын олониитын палата Буряад Уласай Арадай Хуралай Бюджэдэй, татабариин ба мүнгэн һангай талаар хорооной түрүүлэгшын орлогшо Михаил Степановые энэ үйлэ хэрэгтэ уриһан байна. Нээлгын баяр ёһололдо үндэр наһатайшуул, сэрэгэй тусхай үйлэ хэрэгтэ хабаадаһан сэрэгшэд, тэдэнэй аха дүүнэр, сурбалжалагшад болон ниитын ажаябуулгын эдэбхитэдэ хабаадалсаһан байна.
- Иимэ хэмжээ ябуулгануудые саг үргэлжэ үнгэргэжэ байха хэрэгтэй гэжэ һананаб. Жэл бүри сэрэгшэ баатарнууднай үсөөрнэ, фашистнуудай хэрзэгы ябадалые нюдөөрөө хараһан хабаадагшад нүгшэнэ. Эсэгэ орондоо дуратайгаар, сэрэгшэ баатарнуудые сэгнэжэ үхибүүдэеэ һурган хүмүүжүүлхэ шухала. Олонхи ушарта ами наһаяа баатаршалгада зорюулһан, үдэр һүнигүй унтангүй хүдэлһэн хүнүүдые сэгнэхэ хэрэгтэй. Мүнөөдэр буу барижа Эсэгэ ороноо хамгаалжа байһан хүбүүдые хүн бүхэн, илангаяа ургажа ябаа залуу халаан сэгнэхэ ёһотой, - гэжэ нээлгын баяр ёһололдо Михаил Степанов тэмдэглээ.
Улаан-Үдэ хотын Советскэ районой ветерануудай зүблэлэй түрүүлэгшэ Галина Петрова баярай һайхан үгэнүүдые хэлээ. Эсэгэ Ороноо хамгаалгын Агууехэ дайнда хабаадаһан Доржо Гармаевич Норбоев майн 9-дэ Соведүүдэй талмай дээрэ үнгэрэгдэхэ сэрэгэй жагсаалда хабаадаха гэжэ Галина Петрова мэдүүлээ. Борсоевой нэрэмжэтэ үйлсэдэ ажаһуудаг хүндэтэ ветеранай гэр дээрэ тусхай тэмдэг үлгэгдөө. Үдэшэдөө гэрэйнь газаа фронтын дуунай бригада ерэжэ, дайнай үеын дуунуудые хангюурдажа ветераные болон бүхы ажаһуугшадые баярлуулаа.
Амиды мэндэ ябаһан ветерануудта зорюулагдаһан үзэсхэлэндэ Эсэгэ ороноо хамгаалгын Агууехэ дайнда хабаадаһан Бато Бастуевич Федоровой гэрэл зураг онсо анхарал татана. Бато Бастуевич энэ зураг дээрэ сэрэгэй тусхай үйлэ хэрэгтэ баатарлиг үхэлөөр унаһан, Эрэлхэг зоригой түлөө ордендо хүртэһэн Эрдэм Сагбажапович Ниндаков зээ хүбүүнэйнгээ гэрэл зураг баринхай һууна.
- Бато Бастуевич 1945 ондо милитарис Японтой дайнда хабаадаһан юм. Агууехэ Илалтын һүүлдэ уһан далайн сэрэгтэ палубын сапероор алба гараа. Манай хүгшэн аба 8 үхибүүтэй, 18 аша зээнэртэй, 23 гушанартай, 2 дүшэртэй юм. 100 наһа гаталһан хүгшэн абаараа, бүхы аха дүүнэрээрөө омогорхонобди, - гэжэ баатар хүбүүнэй аха дүүнэр хөөрэһэн байна.
Улаан-Үдэ хото, Борсоевой нэрэмжэтэ үйлсын 7а гэһэн хаягаар эхидхэгдэжэ эхилһэн үзэсхэлэнүүдые ямаршье хүнүүд ерэжэ, хараха аргатай.
