Уласай аяншалгын сайд Алдар Доржиевай тэмдэглэһээр, Буряад Улас аяншалгын регион гэһэн байра һуурияа бэхижүүлжэ байна: айлшадай урсалга дээшэлээ, байра байдалай мүнөө үеын инфраструктура байгуулагдана.
"Соёл эргэншэлтэй амаралта зэрлиг аяншалгые һэлгэжэ байна. Энэ бүхы юумэн модульна зошод буудалай барилгын аша туһаар боложо байна, тэдэнь мүнөө республикын аяншалгын бүхы гол үзэсхэлэнтэ газарнуудта бии. Оройдоол гурбан жэлэй туршада Буряад орондо иимэ 54 объектнүүд баригдаа, бидэ энэ түсэл бэелүүлхэ талаар уласай түрүүшүүлэй тоодо бата бэхеэр орообди", - гэжэ Аяншалгын сайд элидхэл соогоо тэмдэглэбэ.
«Байгалай гавань» Буряадай гол үзэсхэлэнтэ газарнуудай нэгэн болохо гэжэ найдуулна. Ородой Холбоото Уласай Юрэнхылэгшэ Владимир Путинай зүбшөөһэн «Табан далай ба Байгал нуур» гэһэн федеральна түсэл мүнөө тэндэ бэелүүлэгдэжэ байна. Долоон инвесторнууд хүгжэһэн аяншалгын инфраструктуратай зочид буудалнуудые барижа байна.
Аяншалагшадай Байгал тойроод суглархада, байгаалида үзүүлхэ нүлөө ехэ болоно. Арадай Хуралай Түрүүлэгшэ Владимир Павлов аяншалга соёл болбосон түхэлтэй, байгаалидаа харюусалгатай байха ёһотой гэжэ онсолон тэмдэглэбэ.
"Аяншалгын хүгжөөлгэ Буряадай эдэй засагай түрүү шэглэл болоно, тэндэ үргэн дэлисэтэй, гуримтай ажал ябуулагдана. Энэ талаар оршон тойронхи байгаали хамгаалгын стандартнуудые сахилга эгээл шухала. Мүнөө ябуулагдажа байһан аяншалгын бүхы томо түсэлнүүд тэдэниие сахиха ёһотой", - гэжэ парламентын түрүүлэгшэ онсолон тэмдэглэбэ.
Буряад Улас зүүн зүгэй заншалта эмнэлгээрээ, онсо эм домто ургамалнуудаар элбэг дэлбэгээр суурхаһан тула эмнэлгын/элүүржүүлгын аяншалга ерээдүйтэй һалбари гэжэ үзэхэ тухай һунгамалнууд дурадхаба.
Буряад Уласай Арадай Хуралай Зүблэл аяншалгын инфраструктура хүгжөөлгэдэ мүнгэн тэдхэмжын талаар федеральна мүрысөөнүүдтэ республикын хабаадалга эршэдүүлхэ тухай шиидхэбэри абаа.
