Улаан-Үдэ хотодо “Дайшалхы самбо барилдаанай лигэ” гэһэн ниитын Гран-При түхэлэй уласхоорондын мүрысөөн үнгэрэгдэнэ. Буряадай түрүү засаг баригшад тус хэмжээ ябуулгые нээһэн байна. Эдэ хэд бэ гэбэл, Буряад Уласай толгойлогшо Алексей Цыденов, Арадай Хуралай түрүүлэгшэ Владимир Павлов, Улаан-Үдэ хотын мэр Игорь Шутенков, тамирай сайд Иван Козырев.
Ород гүрэнэй самбо барилдаанай федерациин түрүүлэгшэ Сергей Елисеев зорюута тус хэмжээ ябуулгада айлшаар буугаа. Энэ үдэр түрэһэн үдэрэйнгөө баярые тэмдэглэжэ байһан Владимир Павловта самбо барилдаашанай хубсаһа бэлэглээ. Юуб гэхэдэ, Арадай Хуралай түрүүлэгшэ залуу наһандаа самбогоор бэеэ һоридог байһан юм.
- Олон гүрэнүүдэй тамиршадай хабаадалгатай уласхоорондын мүрысөөе Буряад Уласнай дэмы угтанагүй. Юуб гэхэдэ, уласнай тамирша можо хизаарнуудай тоодо үнинэй оронхой. Һүүлэй байдалаар, Буряадта гурба гаран мянга хүнүүд самбо барилдаанда ябана. Тэдэнэй дундаһаа олон дэлхэйн абарганууд ургажа гараа, уласхоорондын классай спортын мастер гэһэн үндэр нэрэ зэргэдэ олон самбистнар хүртөө. СССР гүрэндэ хүгжэһэн самбо зүйл мүнөөдэртөө тон ехэ удхатай болоод байна, - гэжэ Владимир Павлов амаршалгын үгэнүүд соогоо тэмдэглээ.
Дайшалхы самбо барилдаанай һонирхолтой уулзалгануудта үндэр нэрэ зэргэтэй тамиршад хабаадаһаниинь һайшаалтай. Европын чемпионадай хоёр дахин абарга Алдар Намсараев, Алас Дурна зүгэй федеральна тойрогой чемпион Владимир Дондуков энэ үдэр Монголой болон Таджикистанай тамиршадтай уулзаа. 64 килограммай шэгнүүртэ Новосибирск хотын мэдээжэ тамиршан Павел Пантелеев Монголой чемпионтой шаалсаа. 71 килограммай шэгнүүртэ Буряадай залуу тамиршан Самба Цыремпилов, Ородой чемпионадта мүнгэн медальда хүртэгшэ Константин Подойницын гэгшэд Казахстанай ба Таджикистанай түрүү тамиршадтай хибэс дээрэ гараха. 79 килограммай шэгнүүртэ Тагар Намсараев Казахстанай самбисттай уулзаха.
