«Эхэ хэлэн – манай баялиг» гэһэн мүрысөөниие Арадай һунгамалнууд дэмжэнэ.
Буряад Уласай Арадай Хуралай һунгамалнууд Александр Бардунаев, Сергей Пашинский, Баир Мункуев, Саян Бальжиров гэгшэд буряад хэлэнэй «Эхэ хэлэн – манай баялиг» гэһэн 53-дахияа эмхидхэгдэһэн мүрысөөниие үнгэргэлгэдэ туһа хүргэһэн байна. Мүрысөөндэ 31 бүлэгүүд хабаадаа.
Ивалгын дасанай дэргэдэ үнгэрдэг энэ хэмжээ ябуулгада байгша онһоо шэнэ нэмэлтэ оруулагдаа. Монгол хэлэ мэдэхэ талаар эрдэм мэдэсэеэ һурагшад харуулха ёһотой.
- Монгол хэлэндэ үхибүүд түргөөр һурана. Буряад хэлэндэ ороходоо, аялгань ондоо байна. Монгол буряад хэлэн адлирхуу ха юм даа. Иимэ аргаар үхибүүдөө түрэл хэлэндэнь һургаха зорилготойбди, - гэжэ Ивалгын дасанай ламанар хэлэнэ.
Буряад хэлэнэй, ёһо заншалай, соёлой талаар эрдэм мэдэсэеэ харуулхаяа уласай аймагуудһаа һурагшад ерэдэг гээшэ.
Хяагтын аймагһаа һунгамал Баир Мункуевай тэмглэһэнэй ёһоор, түрэл буряад хэлэеэ сахин хүгжөөхэ зорилготой энэ мүрысөөниие дэмжэхэ шухала.
- Юуб гэхэдэ, ургажа ябаһан эдиршүүлнай буряадаараа һайнаар дуугарха ёһотой. Бидэ, Арадай Хуралай һунгамалнууд саашадаашье, энэ мүрысөөниие дэмжэжэ, шадаха зэргээрээ туһалжа байхабди, - гэжэ Баир Мункуев хэлэнэ.
Буддын шажанай заншалта Сангхын мэдээсэһээр, буряад дэгэлээ үмдэһэн хүбүүд басагад энэ мүрысөөндэ ерэхэдээ, һайндэртэ ерэһэн шэнги бүхы эгээл гоё һайханаа үмдэжэ, эрдэм мэдэсэеэ харуулна. Буряад арадайнгаа ёһо заншал, соёл түүхэ тухай мэдэжэ ябаха гээшэ ехэ сэнтэй.
2014 онһоо «Эхэ хэлэн – манай баялиг» гэһэн мүрысөөн эхилһэн түүхэтэй.
