Буряад Уласай Арадай Хуралай һунгамалнууд Монголой нютаг можын хүтэлэлгын шэнэ гуримай байгуулагдаһаар, 30 жэлэй ойн баяраар амаршалба.
Буряад Арадай Хуралай түрүүлэгшэ Владимир Павлов, Арадай Хуралай түрүүлэгшын орлогшо Баир Гармаев, һунгамал Анатолий Кушнарёв, можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшэ Виталий Лыгденов гэгшэд баяр ёһололой хэмжээ ябуулгада хабаадана.
Владимир Павловай, Арадай Хуралай түрүүлэгшын, тэмдэглэһээр, хэр угһаа хойшо Оросой Холбоон ба Монгол гүрэн, Оросой Холбооной Буряад Улас, мүн Монголой Сэлэнгын аймаг эб найрамдалай олон жэлэй түүхэ дээрэ үндэһэлэн, хоёр талада аша үрэтэй холбоо тогтоонхой.
- Монгол ба буряад арадуудай хэлэн, соёл, ёһо заншал адлирхуу гээшэ. Аха дүү мэтэ харилсадаг хоёр арадай эб найрамдалай хүгжэлтэ юунһээшье сэнтэй. Үшөө 2001 онһоо эхилжэ, Монголой Гүрэнэй Ехэ Хурал Буряад Уласай Арадай Хуралтай суг хүдэлхэ тухай тогтоол баталһан байна, - гээд Владимир Павлов хэлээ.
Арадай Хуралай һунгамалнуудай хабаадалгатай хэдэн уулзалганууд Монгол гүрэндэ үнгэрхэ байна. Росси-Монгол гүрэнүүдэй хоорондохи харилсаанай хүгжэлтэ, парламентнуудай суг хамта харилсажа хүдэлхэ асуудалнууд зүбшэгдэхөөр хараалагдана.
